ابى كلمه رجال

بسم الله الرحمن الرحيم



اعضاء الجاده الكرام كانوا مشرفين او اعضاء او زائرين طيب الله اوقاتكم



الاكيد اننا نعيش بمجتمع في سلبيات كثير ومن ضمنها الي يطلقون عليه كلمه الرجال
مفهوم ان كلمه الرجال وحده او كلمه الرجال سيف حتى بمجتمع الحريم للاسف دايم
اسمع لاجت الوحده توعد خويتها تقول ابي كلمه رجال وكأن كلمه الرجال قرآن منزل لا
يمكن تغييره
الوفاء بالوعد للمسلمين جميع مطلوب والمعروف ان من صفات المنافقين الاخلاء بالوعد
لكن المقصود ان كلمه الرجال حتى لو كانت غلط صعب يتنازل عنها راح اعطيكم مثال
بسيط
واحد جاه شاب قاله ابي اخطب بنتكم قاله الرجال خلاص موافق راح الرجال قال لبنته
البنت رفضت ومن حقها طبعا الاب قام الدنيا وقعدها شلوووون وانا عطيت كلمه للرجال
في النذر لله الانسان اذا حلف على شي مخالف للدين او فيه مضره له حلفه باطل ونذره ما
يتم
كيف بكلمه يمكن يتحتم عليها هدم بيوت بعض الرجال الله يهديهم مستحيل يغير كلمته
حتى لو كان متأكد انها غلط بس علشان مفهوم ان الرجال الي يغير كلمته مهب رجال


ليه مجتمعنا يعتبر كلمه الرجال وحده وغير قابله للتغيير ؟



بمقابل هالكلام التغيير بالانسان احنا مجتمع مانتقبل التغيير وناخذ الانسان على عهد
قديم من التصرفات بجيب لكم قصه علشان توضيح للمعنى ,,,
كان لي صديقه قبل كم سنه اجتمعت مع اختي مره وكانت معي صديقتي هذي كانت
تتكلم بامور سيئه نوعا ما وكانت بالنسبه لاختي الملتزمه جدا نوع من الانحراف
المهم ان دارت السنين ومشت الايام وصديقتي هذي تغيرت بشكل كبير وتفكيرها كله
تغير وكلامها القديم صار بالنسبه لها سيئ لكن الي صار اني قبل فتره قلت لاختي ان
هذي صديقتي تسلم عليها وتقول لها ودها تشوفها الرد من اختي ان مابي اشوفها لانها
انسانه منحرفه وماهي مضبوطه قلت لاختي انتي تتكلمين من سنين قالت بس انا اتكلم
عن شي حصل قدامي وخلاص عرفت طبيعه هالبنت واهتماماتها والمفروض انتي بعد
ماتمشين معاها ؟؟
للاسف ان هالموقف حصل معي اكثر من مره ومع اكثر من شخصيه احيان تذكر
شخصيه لوحده قدامي ويبدأ السب والشتم فيها لانها مره قالت كذا ولان شافوها لابسه
كذا انا شخصيا اؤمن ان الانسان يتغير بيوم يعني الي امس كانت تفكر غلط ممكن اليوم
تفكر صح والعكس صحيح لكن دائم احنا مجتمع مانتقبل التغيير والصوره الي نرسمها
للشخص تستمر بعقلنا ليه ؟
في حديث للرسول يقول( سبحان مقلب القلوب ) القلوب تتقلب وهي بين اصبعين من اصابع
الله يقلبها ليل نهار
بعض الناس نفسها ماتبي تتغير علشان تخجل ان شلون كل يوم لي كلمه اذا كانت كلمتك حق
وتشوف انها الافضل ليه ماتغيرها مثلا انا بموضوع قلت هالشي زين وانا احبه بعد كم يوم
موضوع نفسه قلت لا مو زين معناها ان عندي انفصام شخصيه وماعندي كلمه او معناها
اني شفت شي ثاني كان تفكيري انه زين لكن عرفت انه مو زين وغيرته





وبعض الناس الله يهديهم يروحون يفتحون ملف الشخص ويطلعون رد له باحد المواضيع ويستدلون فيه ان كيف انت قلت هالرد وجاي هنا تقول رد ثاني ويمكن بهالفتره الواحد تغير قلبه ليش ننبش بالماضي ؟






دائم ناخذ ان هالشخص ماله كلمه ليه وش السبب علشان كلمه تغيرت ؟



الزبده من الموضوع بمجتمعنا كلمه الرجال ماتتغير لو كانت غلط او لو بغى يتراجع عن قرار
صار بالنسبه للناس ماعنده سالفه وانه مو رجال ؟
وان الانسان ياخذ انطباع عن شخص ومايقبل التغيير فيه وحتى بعضنا انفسنا نخاف نتراجع عن
قرار او راي علشان نظره الناس ان الي يغير كلامه معه انفصام شخصيه او عقله فيه شي ؟


مقوله كل ماقرأتها احسست بخيبه امل
الشخص الوحيد الذي أعرفه ويتصرف بـ عقل .. هو الخياط
فـ هو يأخذ مقاساتي من جديد .. في كل مرة يراني
أما الباقون فـ يستخدمون مقاييسهم القديمة .. ويتوقعون مني أن أناسبها



كم خياط بحياتك ؟؟؟